採青

22-Feb 今日公司有採青喎, 估唔到日本公司都有呢d咁中國傳統o既活動喎~~~我都係第一次見jar, 好得意咁....

 

拆利是的大日子

21-Feb 今日高仔接我放工, 去我屋企食飯飯....因為今日係我拆利是o既大日子呢!!!今年高仔要見証住呢個時刻, 哈哈哈~~~

 

我同細佬都係每年農曆十五就拆利是, 好開心呢, 又有一筆住帳囉~~不過, 人愈大收到o既利是就會愈少, 今年的確收得好少, 最起碼冇左賀平舅父o個份, 舅父一走左, o個個女人就連新年都冇黎過, 太過份了, 一提起佢就嬲

收到二千幾蚊人仔, 打算放入銀行等佢升值, 哈哈!!

日通舊同事聚會

20-Feb 終於可以約到日通舊同事食飯啦, 好開心呢!! 因為大家都好忙, 所以好難先可以約齊人食一餐飯.....我地去左荃灣大河道o既江戶前食日本野, 好鍾意咁多個女仔有講有笑o既感覺, 真係好開心~~

 

可惜Kathy臨時甩底, 而Peggy又o係我地差唔多食飽先黎....哈哈, 不過o係我威迫下都影左兩張合照 (因為次次出黎食飯都冇影相, 但係我冇記性, 所以要拍底), YEAH!!

肥肥病逝

19-Feb 今日o係公司知道左肥肥病逝o既消息, 有d感慨!!!令我諗起我過左身o既賀平舅父, o係到諗肥肥都可以捱到成兩年先走, 但係點解我舅父知道有病後都冇半年就走左.....我知道每個人所經歷o既野都唔同, 生老病死都係一出世就註定, 好記得有個autie同我講, 人生世事變化無常, 所以要珍惜現在所擁有o既一切, 先至係無枉過!!! 仲有高仔同我講, 如果要舅父好辛苦咁活下去, 捱下去, 太自私了...我知道我唔可以咁自私, 現在只想賀平舅父在另一個世界生活幸福快樂, 無憂無慮!!!

奶奶屋企拜年

17-Feb 今日媽咪, 細佬同我入馬鞍山同奶奶拜年, 自從搬左出大圍後, 都係新年先見到奶奶, 芳姐姐同聰哥哥. 以前間唔中都會上佢地屋企玩下坐下架....我地去左耀安龍華閣飲茶, 之後上左奶奶屋企坐, 仲攞左d衫返去tim (因為芳姐姐做merchant o既, 有好多衫版)....

我地仲興起打麻雀, 點知打到夜晚十點先走, 哈哈, 好誇張!!! 夜晚我地叫左外賣 pizza, 又係鮑魚片芝汁口味, 好好味呢!!!

北角做問卷&高仔家

16-Feb 今朝高仔陪我出北角遠運大廈做問卷, 攞左d M巾返屋企試用, 本來諗住過左海, 搭叮叮去金鐘, 去埋香港動植物公園行下影下相, 但係高仔唔舒服, 所以我地係灣仔落左車食左野就搭巴士返高仔屋企啦....

係佢屋企其實都冇乜野做, 我本來想返自己屋企睇下戲, 宜家就當係陪下佢啦~~種在仙人掌旁的菜, 好大棵呀

咁岩見到佢三家姐, 三姐夫同BB喎, BB岩岩出世無耐, 所以好細個咁呀, 好得意呢

一週年

14-Feb 今日係我同高仔拍拖一週年紀念, 時間好似過得好慢咁, 因為同佢o既感覺唔似一年, 而係兩三年

 可惜高仔唔舒服, 所以冇得大肆慶祝, 我地去左海皇粥店食, 佢食粥, 我食炒米粉, 仲有牛肉腸tim, 雖然係簡簡單單, 但係都好開心啦....(今日食飯好貴o既, 又多人, 不如留返d錢第日食好過啦)~~

 

行左一陣我地去左獅子亭, 佢話要揀個安靜o既地方送份禮物比我喎, 佢成日話份禮物唔值錢, 驚我唔鍾意.....原來佢親手整左段片比我, 裡面有我地呢一年影o既合照, 其實都好有心思, 不過冇得帶住囉!!

 

而我就送左一個親手整o既車仔cushion同埋朱古力比佢, 應該叫做莎莉蛋糕至岩, 因為想整朱古力整左蛋糕出黎, 哈哈哈哈~~~

 

呢個就係我問Sonia借左個鴨仔溶朱古力器, 都好有用呢, 起碼唔使隔水煮溶d朱古力YEAH!

細佬高仔@新城市

11-Feb 放工同兩個同事過左隔離大廈間樓上舖買朱古力, 準備聽晚整朱古力比高仔, 嘻嘻..之後同高仔坐巴士去新城市會合細佬食飯.

細佬今年都話整朱古力呀, 所以佢買左d好靚o既包裝袋, 本來諗住去偉華中心o既Maple食dinner, 點知冇開, 去吉野家又勁多人, 最終去左好運中心o既happy together 食. d野好貴, 我地叫左一個焗飯, 一個鐵板餐同一個免牛飯都要成百二蚊, 好唔抵呀!!!

 

好岩高仔style o既wall ar, hahaha