Relax 的一天

15-Mar 今朝早o係屋企睇書, 終於睇完肥恩借左比我好耐既"150cm life2"啦, 但係仲有好多書未睇

 書呀書, 你等我呀, 我一定會慢慢睇晒你架, 比d時間我!!

晏晝做完facial 陪媽咪買餸, 今次又冇sell我喎, 可能佢地多人, 哈哈...仲睇左"現代塵世美" tim, 今晚食埋飯去接高仔放工, surprise~~

休息一天(no running)

13-Mar 今日隻腳累到暈呀, 好似比人打左一身咁呀

 所以我同Sonia都舉手舉腳贊成休息一天, 嘻嘻~~

 

今日仲收到好突然o既消息, 就係我個大老闆Hara san 四月中要調去Poland, 聽講佢o係到做先得兩年jar, 咁快就調佢走, 雖然我對住佢先係大半年, 但係都有d唔捨得o既, 始終我覺得Hara san都好好人, 對我地好好, 又唔知黎緊個新老闆係點呢

 

今晚同高仔去左馬鞍山一間餐廳食飯, 有我好鍾意食o既法國田螺, 正呀....都係食左唔係好多野jar, 因為驚前兩晚做得咁辛苦o既運動白費呀...

Running@Shing Mun River

11-12/Mar 呢兩晚放左工高仔& Sonia陪我去running!! 高仔踩單車, Sonia同我就running. 我地 8:30 由大圍出發, 沿住城門河跑到富豪折返返大圍.

 

咪以為路程好短呀, 咁樣跑一圈都用左一個鐘架, 真係跑到上氣唔接下氣架; 特別是我都唔鍾意running, 真係好辛苦, 我寧願play badminton, swimming & cycling啦.....

 但係為左瘦, 無計啦, 要努力

!!! 跑完當晚都冇事, 唔係好累, 第二日返工就慘啦, 對腳勁酸, 我對腳已經唔係自己架啦.....

一家人dinner

10-Mar 今晚高仔黎我屋企食飯, 之後我就唔o係屋企食啦, 因為我要keep fit!!!我要o係去日本之前瘦d瘦d呀

 由聽晚開始我就要running, 放左工去running, 我要瘦!我要瘦!

佢地個個都話我: 你呢d三分鐘架je, 睇你可以跑幾耐~

hea的一日

9-Mar 今日成日都o係屋企休息, 睇左Eason做o既"再見塵世美", 介紹澳洲o既塔斯曼尼亞, 呢個地方真係好靚, 靚到暈

 

夜晚睇明珠台o既"逃出魔幼紀", 可能恐怖得滯, 訓覺發惡夢

巧合

8-Mar 同Cwai o係大圍椰林閣食lunch, 一傾竟然傾左兩個半鐘都唔知. 我地就係咁, 無所不談, 時間不知不覺就過去. 仲係返屋企途中見到細佬tim, 呢個係第一個巧合.....

 

高仔放工後黎接我去新城市食飯, 又比我撞到Cwai, 第二個巧合, 今日先見完佢, 哈哈, 呢d就係人與人之間o既緣份啦. 我好信緣份呢樣野, 有d人見過一次就唔會有機會再見, 有緣o既某年某月會o係街到撞到....

 

最後同高仔o係西田食拉麵, 燒餅同蛋包炒麵, 仲影左cut hair之後第一張相tim.....

 

得winnie一個話我剪左頭髮之後大個左

語重心長

7-Mar 今日見細佬又出街, 我好語重心長咁o係msn同佢講左幾句. 我叫佢比心機讀書, 雖然宜家學費好貴, 但係錢唔係問題, 只要佢有心機讀上去, 我做家姐o既一定會供到佢讀大學架!!

 

佢應承我會比心機讀書....其實佢想做乜想買咩, 我會比佢做比佢買, 我知道佢咁大個人會有分寸, 我真係希望佢會識諗, 知道呢個家姐有幾鍚佢...講真我自己讀唔到大學, 我好希望細佬可以, 第時出黎可以搵一份好o既工作, 唔使好似我以前咁苦惱, 我知道佢第時出左黎做野之後會有好多野要面對, 所以我希望自己宜家有咩比到細佬o既都會比佢~~~

壓力爆煲

5-Mar 今日o係公司做到喊, d野又多又趕, 我無諗過o係呢到都會有呢個感覺架, 以前o係日通就會有, 原來呢d就係無形o既壓力啦....我一直在公事上都好堅強, 今次真係好頂唔順, 最終壓力爆煲, 爆左

 不過好快就冇事lu, 因為係咪都要做架啦, 收拾左心情繼續做...做...做...

 

放左工攞媽咪煲o既花旗參煲雞比高仔飲, 佢都係第一次見我個新髮型....

新形象

2-Mar 今日係大圍椰林閣開茶會, 哈哈, 係我地自己攪o既日本旅行前茶會, 好認真架我地....大家傾下行程需唔需要變動, 有咩景點需要加插, 注意等等.....

宜家心情好興奮呀, 我驚去到日本我會瘋狂呀!!

 

之後高仔車我入馬鞍山Eddy到剪頭髮, 我要換換新形象, 宜家個髮型太悶啦, 而且束得多, 頭頂d天線愈來愈多我帶左幾張相比Eddy睇, 個心真係好驚剪左會唔好睇呀, 呢個就係我想剪o既髮型啦, 哈哈....最終緊係剪得唔似啦, 因為次次都係咁o既

不過好彩去搵Eddy剪, 始終佢幫我剪開, 對佢有信心d~~

花轎比賽@紅磡都會

1-Mar 今日同高仔去鹿苑食河粉, 之後我地去紅磡都會廣場睇所謂o既"國際花轎比賽"...仲諗住有好多外籍情侶著住婚紗/不同o既結婚禮服比賽, 原來唔係咁o既

 

 

但係可以見到思琦妹, 一哥同喬寶寶喎, 好開心呢, wakaka~~~我呢排好大明星緣, 上次行百萬行又見到何家勁, 哈哈!!

 

思琦妹好瘦, 好sharp, 但個妝都幾厚, 最可惜我同唔到佢合照; 我幾時先可以有佢咁瘦呢, 好似好難咁...要努力啦~一哥同喬寶寶都好nice, 同佢地合照都無問題, 嘻嘻....

 

睇到差唔多五幾我地返馬鞍山睇居屋示範單位, 個view好靚, 全海景望吐路港....我地會搏下抽啦, 但係都好難抽, 就算真係抽到都有好多善後o既問題要處理

 

夜晚去左河畔o既交通安全城食盤菜, 係高仔屋企人搞o既....同佢d外甥去隔離個遊樂場玩, 仲見到田北俊tim~~~