Flora 咩咩仔的小花園

2011/10/01

Happy Wedding of Samuel & Jenny@香港黃色海岸遊艇會

今日係Samuel & Jenny既註冊日子, 亦係高仔做兄弟既日子! 我都悉心打扮出席

因為大家既男伴都要做兄弟, 我同Livia就相約一齊入去, 係荃灣西鐵路站坐141專線小巴, 就會去到香港黃色海岸商場門口. 架車冇人上車, 我地全程包車入到去. 一落車就多到 Pass K同Patrick啦. 我同Livia係最早到既人客, 見到高仔啦, 幾帥!

高仔要做埋MC, 所以忙著對稿, 我同Livia就周圍影相囉!

Samuel & Jenny都係設計師, 所以每個細節都做到好細膩, 連擺設裝飾都好有設計師既風範喔

會場有茶點飲品供客人品嚐, 我都一嚐朱古力味cupcake, 好美味喔, 呵呵

天公造美, 雖然冇乜太陽, 但一滴雨都冇落呀. 整個婚禮都係戶外進行, 雖然場地唔大, 只容納數十人, 但係至親親朋好友見證下, 一齊分享呢份喜悅, 實在太幸福啦!

兩點半, 婚禮正式開始! 新娘子漂亮咁進場啦

因為一對新人都係基督教徒, 所以安排左牧師分享, 唱詩歌, 當唱到"愛是不保留"既時候, 我都忍唔住喊左出黎, 歌詞真係令人好感動
全部既人客都獲派一個紫色汽球同一張memo, 寫低我地對一對新人既祝福. 一對新人宣誓後, 正正式式結為夫婦啦, 祝佢地永遠都幸福快樂, 直到永遠!

新娘子好靚呀, 我好鍾意新娘子既婚紗呀, 好特別!

好似美人魚咁

兄弟姊妹合照

高仔今日奔波左成日都好累啦

搞到六點幾, 車埋新娘子既媽咪返屋企, 終於搞好啦, 到我地食飯啦!!! 下篇再續.....

2011/09/29

Holloween@新城市

經過新城市廣場, 已經佈置左關於holloween既擺設啦, 好鍾意呢個玫瑰花既佈置

但唔知呢個公仔係乜水囉

食飯前係好天氣, 心情都一樣; 但食飯後.........同天氣一樣變左下雨天......

2011/09/25

又shopping啦

交晒d project, 終於有得放鬆下啦~~~我, 最大既興趣除左睇蝴蝶, 行山外, 就係shopping啦!!! 又係時候同媽咪出去行下啦!!!
買左條裙, 一件今年大熱既西裝褸, 咁樣襯都好好睇喎!

2011/09/24

踩爆東涌至迪欣湖

講左好耐, 終於可以踩東涌至迪欣湖啦!!! 次次都係因為天氣唔好去唔成既, 原本今日有我, 子謙同Cherry, 但Cherry臨時放飛機, 最後得我同子謙去, 都冇影響我地既玩樂情緒呀!!! 先係大圍坐E42入到東涌消防局落車, 跟住過對面馬路轉38號去逸東邨巴士總站落車. 到達後, 我地食去醫肚

食飽飽就行左過村屋個邊間單車舖租車啦. 呢間SunnyBike, 價錢唔算好優惠, 半日=3.5hrs, 全日=8hrs, 我地揀左全日, 因為我地相信3.5hrs應該唔可能來回迪欣湖 $50揀好戰車就出發啦!!!

子謙好犀利, 認得d路點行, 可能睇得太多了 haha 我就唔認得啦, 如果我再去, 都未必記得點行 -.-''