漁屋放題@荃灣

一家人既放題聚餐, 拖拖拖, 拖到我考完試, 終於實踐啦! 今次揀左荃灣荃新天地2期既漁屋, 貪佢近我老爸放工地點, 唔使老爸為左食餐飯撲出去旺角, 而且食滿$300或以上就有兩小時免費泊車, 都好方便呀!   漁屋- 原來係一間幾開放既餐廳, 環境唔算大, 座位亦唔算寬敞. 價錢方面, 星期一至四, 每位$168; 星期五至日, 每位$178, 汽水任飲, 限食兩個鐘. 訂左7點五位, 7點黎到等左幾分鐘就可以入啦. 見到d紙仔, 我地即刻填, 啦啦聲入單, 因為見openrice好多食評都話佢係咁飛單......

先上既係肥牛煲, 份量唔算多, 但味道ok

烤物, 乜都點d: 牛丸, 魚蛋, 芝士丸, 雞軟骨, 多春魚, 味道不過不失, 最好味係芝士丸, 有爆醬!

刺身, 都算新鮮

壽司, 都可以, 但紫菜應該放左好耐, 全都軟既

肥牛金菇卷, 配上烤汁味道唔錯

火炙芝士蝦壽司

黎食放題點少得炸物(天婦羅) 呢, 南瓜, 番薯, 蔬菜, 蠔, 樣樣都試下, 味道都ok 

卷物, 我地點左應該冇咁多, 唔知點解黎咁多, 係咪想塞飽我地呀!!!

清酒煮蜆, 有好香既清酒味, 絕不馬虎喎

芝士年糕, 裡面既芝士熱辣辣, 正呀, 但略嫌粉味過多, 唔及名將既好味

炒雜菜, 用黎調劑一下, 味道一般

豬頸肉, 唔錯呀

我地食左大概1.5小時就走啦, 覺得服務, 環境, 食物款式同味道都ok 呀, 飛單問題都唔算好嚴重, 但美中不足既係冇甜品.......