Day 4-冰湖-下

好似仙景咁..... 但係我地幾時先到架, 點解行左四個鐘都仲未到呀

落住毛毛雨, 真係凍到毛骨悚然呀    

行到好累啦, 腳都已經唔係屬於自己啦

行左五個鐘, 終於....終於到左大本營, 呢個只係去冰湖既中途休息站....前面仲有漫漫長路要行呀><

搵左間屋仔入去透個火煲個水煮個方便面食, 真係唔想出去呀, 出面天寒地凍....

休息完我地要向冰湖進發啦!!! 今次師傅留o係屋仔等我地, 我地自己上冰湖....點知....我地竟然迷途路了>< 師傅見我地走錯方向, 向住雪崩之路行, 佢好緊張咁跑上黎搵我地, 但係佢未到之前, 我地好想行返冰湖既方向, 所以向住森林狂爆, 希望慳返d時間去到冰湖.....

最後.....好可惜, 我地都已經唔夠時間去冰湖啦, 因為上冰湖都要一至兩小時, 仲要預四小時下山.....好遺憾呀, 咁辛苦行到上黎, 都上唔到冰湖....

冰湖應該係咁既....真係同佢有緣冇份啦

影唔到冰湖, 唯有影下冰啦....仲記得我地爆林時聽到轟轟隆隆既聲音, 原來係雪崩呀...    

冰層    

隱約都見到冰下的藍, 呢d就係上幾千年既冰啦, 可惜, 宜家都融化到曝露左出黎

大家都拖住疲乏既身體下山了....

\

走上四小時到逹客棧, 已經七點幾, 休息了一會又要趕路啦....我地今晚要到下雨崩村, 所以辛苦極都要行, 行上45分鐘, 終於到下雨崩村....我地連講野既氣力都冇, 食好飯就沖涼訓啦. 今晚勉強都可以有熱水沖涼, 但洗頭.....簡直係妄想呀, 因為就算你洗左頭, 都冇風筒比你吹頭, 所以如果你唔怕第二日會頭痛到爆既話, 你即管可以試試. 我就因為這個原因, 已經四日冇洗頭啦....個頭, 唔使落gel, 都已經成個郭富城咁啦 難頂死啦!!!

今日, 係我咁大個囡, 有生以來最最最最最最辛苦既一日!!!! 行左十幾個鐘, 每行五步就要休息廿秒, 成個身體都累到不得了, 特別係對腳, 就快要斷咁呀, o個一刻真係好想有飛行服務隊黎救我呀, 但我知道黎到呢到, 唔會有人救到你, 救到你既只有你自己, 呢種辛苦我呢世都唔會忘記架!@@